1 Samuel 31
USawuli uyazibulala
1Ngalesosikhathi amaFilisti alwa lo-Israyeli, abako-Israyeli babaleka, njalo abanengi babulawa eNtabeni iGilibhowa. 2AmaFilisti axotshana kanzima loSawuli lamadodana akhe, abulala amadodana akhe uJonathani, lo-Abhinadabi kanye loMaliki-Shuwa. 3Impi yatshisa macele wonke kuSawuli, njalo kwathi abemitshoko sebemxhumile, bamlimazela ukufa. 4USawuli wasesithi kumthwali wezikhali zakhe, “Hwatsha inkemba yakho ungigwaze, hlezi abantu laba abangasokanga bafike bangigwaze besebengiphatha kubi.” Kodwa umthwali wezikhali zakhe wesaba, akaze akwenza lokho; ngakho uSawuli wathatha eyakhe inkemba waziwisela kuyo. 5Kwathi umthwali wezikhali ebona ukuthi uSawuli wayesefile, laye waziwisela kweyakhe inkemba wafa. 6Ngakho uSawuli lamadodana akhe amathathu lomthwali wezikhali zakhe kanye labantu bakhe bonke bafela ndawonye ngalo lolosuku. 7Kwathi abako-Israyeli ababesekele isigodi lalabo ababengaphetsheya kweJodani bebona ukuthi ibutho lako-Israyeli lalibalekile kanye lokuthi uSawuli lamadodana akhe basebefile, batshiya imizi yabo babaleka. AmaFilisti afika ahlala kuyo. 8Ngelanga elalandelayo, amaFilisti esefikile ukuba akhuthuze abafileyo, afica uSawuli lamadodana akhe amathathu befile eNtabeni iGilibhowa. 9Aquma ikhanda lakhe athatha lezikhali zakhe, asethuma izithunywa kulo lonke ilizwe lamaFilisti ukuba zimemezele indaba le ethempelini lezithombe zawo lasebantwini bakibo. 10Abeka izikhali zakhe ethempelini lama-Ashithorethi. Kwathi isidumbu sakhe asibethela emdulini weBhethi Shani. 11Kwathi abantu baseJabeshi Gileyadi besizwa ngokwakwenziwe ngamaFilisti kuSawuli, 12wonke amaqhawe abo ahamba ubusuku bonke esiya eBhethi Shani. Ethula isidumbu sikaSawuli lezamadodana akhe emdulini weBhethi Shani aya eJabeshi, lapho azitshisela khona. 13Athatha amathambo abo awambela ngaphansi kwesihlahla somthamari eJabeshi, asezila izinsuku eziyisikhombisa.
Copyright information for
NdeIBE